GASTRONOMÍA DE GALICIA

Boa tarde familia.

Volvo estar por aquí para cumprir o prometido e achegarvos un anaco máis da cultura de Galicia. Neste caso, falareivos da gastronomía. Pero non quero aturullarvos con datos, gustaríame levar este tema a unha experiencia práctica. Por iso vos propoño un plan para cando queirades visitar Galicia e coñecer a súa gran variedade gastronómica.

Considero esencial que si visitades a nosa terra provedes algunha dos nosos pinchos e tapas que son elementos característicos da nosa gastronomía. A provincia de Lugo ou os arredores de Santiago son dous lugares fantásticos para degustar tapas como empanada de xoubas ou bacallau, zorza, callos, raxo, pementos de Padrón, tortilla de pataca... As tapas galegas soen ser consistentes e non se reducen a unhas simples olivas ou patacas fritas, isto é sinal da tradicional bonanza galega en produtos alimenticios, constituíndo na actualidade uns reclamos turísticos de moitas vilas e cidades.

As comidas tradicionais galegas están baseadas principalmente na carne e na verdura, sendo característico da súa cociña os pratos abundantes e de gran contido calórico, sobre todo nos meses de inverno. Se visitades Galicia é imposible que non atopedes algunha localidade en feira, para poder probar o típico polbo á feira, que se sirve con cachelos e é aderezado no momento con sal grosa, pemento e aceite de oliva. Podedes visitar calquera restaurante das catro provincias, xa que nos seus menús seguro non faltan pratos como o caldo galego, o lacón con grelos, o churrasco ou o cocido. Recordade que o mellor acompañante é un bo pan, aconséllovos o Pan de Cea.

Os privilexiados que visiten Galicia sen ter que conducir poderán probar o gran abanico de licores e augardentes, a queimada ou gozar dunha Estrella Galicia en calquera terraza dos nosos bares.

Antes de despedirme, gustaríame recordarvos que non podedes marchar sen degustar os nosos postres e queixos, como a tarta de Santiago ou Mondoñedo, os amendoados de Allariz, o leite fritido  ou o queixo de Arzúa, San Simón da Costa ou Cebreiro.

Que teñades unha boa tarde e a encher o bandullo, un saúdo.